ಬಳಲಿದ ಕಾಯ !!!

ಮಳೆ ನೀರು ಸೋರುವ ಗುಡಿಸಲು,
ಒಲೆ ಮುಂದೆ ಕುಳಿತ ಒಣ ದೇಹ ,
ಗಂಜಿ ಬೇಯಿಸಲು ಒಲೆ ಹಚ್ಚಲೂ ಇರದ ಶಕ್ತಿ,
ಕಬ್ಬಿಣದಂತಿಹ ಆಕೆಯ ಎಲುಬುಗಳು
ಬತ್ತಿ ಹೋಗಿರುವ ಎದೆ ಹಾಲು
ರವಿಕೆಯಿಂದ ಮೊಲೆಗಳು ಹೊರ ಇಣುಕಿದ್ದರೂ,
ಸೆರಗು ಎಳೆಯಲಾರದಷ್ಟು ಇಲ್ಲದ ಪ್ರಜ್ಞೆ..
ಹಸಿದ ಮಗುವಿನ ಚಿಂತೆಯಲಿ
ಇನ್ನೂ ಬಾರದ ಗಂಡನ ಕಾಯುವಿಕೆಯಲಿ..


ಹೊರಗೆ ಮಲಗಿರುವ ಹಸುಗೂಸು,
ಬಳ್ಳಿಗೂ ಸಾಟಿ ಎಂಬಂತೆ ಒಣಗುತ್ತಿಹುದು,
ಹಸಿವು ತಾಳಲಾರದ ಆಕ್ರಂದನ,
ಎದೆ ಹಾಲಿನ ರುಚಿಯೂ ತಿಳಿಯದ ಬಡ ಕೂಸು,
ಬಲಿತಿರದ ನಾಲಗೆಯಲ್ಲಿ ಹಸಿವನ್ನು,
ಅಳದೆ ಹೇಗೆ ಬಣ್ಣಿಸಿತು ?


ಅಳಲು ತಾಯಿಯ ಹೃದಯ ಮುಟ್ಟಿತೇ ಹೊರತು
ಸಂತೆ ಬೀದಿಯ ಹೆಂಡದಂಗಡಿಯಲ್ಲಿ
ಶರಾಬು ಕುಡಿದು,
ಹೆಂಡತಿ ಮಗುವಿನ ಚಿಂತೆಯಿಲ್ಲದೆ
ಊರೊರಗಿನ ತೋಟದ ಮನೆಯಲ್ಲಿ,
ಸೂಳೆಯ ಮಗ್ಗುಲಲಿ ಮಲಗಿರುವ
ಹುಟ್ಟಿಸಿದಾತನ ಕಲ್ಲು ಹೃದಯವನಲ್ಲ...